NMH+ÅKS – Ål Kulturskule

NMH flyttar klasserommet frå Oslo til Ål

4.–8. november kjem ei gruppe musikkpedagogikk-studentar frå Musikkhøgskolen til Ål.

I fem dagar skal dei undervise, spele og lære, for og med lokale krefter.

Mellom anna vil dei ha undervisning og samspel med elevar i kulturskulen (ÅKS), workshops og konsertar i grunnskulane, konsert og songstund for bebuarar på Ål bu- og behandlingssenter, songstund med Ål introsenter, og konsert med elevar frå kulturskulen og lokale samarbeidspartnarar.

Konserten NMH + ÅKS = Eit musikalsk vennskap finn stad 7. november kl. 18:00

I 2022 inngjekk Noregs musikkhøgskole ein treårig partnarskapsavtale med Ål kulturskule om praksisopphald for studentar ved bachelorprogrammet i musikkpedagogikk. Sidan då har ei ny klasse med musikkstudentar hatt arbeidsveke på Ål kvart haustsemester, der dei inngår i ulike undervisnings- og formidlingsaktivitetar i og rundt kulturskulen.

Studentane får oppleve ei distriktskommune der kultur står sentralt, og der kulturskulen er ein viktig aktør i styrkinga av kulturell utfalding i lokalsamfunnet.

Bachelorprogrammet i musikkpedagogikk ved Noregs musikkhøgskole er ei utøvande musikkutdanning med ei integrert PPU (praktisk pedagogisk utdanning). Ved godkjent utdanning blir studentane formelt kvalifisert til å undervise i barne- og ungdomsskulen, vidaregåande skule og i kulturskulen. I tillegg jobbar mange av dei i det frivillige musikklivet, og kombinerer utøvande og pedagogisk verksemd.